📰 शेतकऱ्यांच्या घरात चोरी; बावी गावात भीतीचे वातावरण

April 13, 2026

जामखेड | तालुका प्रतिनिधी अमृत कारंडे
जामखेड तालुक्यातील बावी येथे शेतकऱ्यांच्या घरात अज्ञात चोरट्यांनी घरफोडी करत सोन्याचे दागिने व रोख रक्कम असा सुमारे ७२ हजार रुपयांचा मुद्देमाल लंपास केल्याची घटना घडली आहे. या घटनेमुळे परिसरात भीतीचे वातावरण निर्माण झाले असून ग्रामीण भागातील नागरिकांमध्ये असुरक्षिततेची भावना वाढली आहे.
मिळालेल्या माहितीनुसार, बावी येथील शेतकरी अभिजीत भास्कर निकम (वय २९) हे ११ एप्रिल रोजी रात्री सुमारे ११ वाजता कुटुंबासह जेवण करून झोपले होते. घरातील काही सदस्य घराच्या पडवीत तर अभिजीत निकम हे बेडरूममध्ये झोपले होते. दरम्यान, १२ एप्रिल रोजी पहाटे सुमारे ४ वाजण्याच्या सुमारास त्यांच्या आई अशाबाई यांनी त्यांना उठवून घरात चोरी झाल्याची माहिती दिली.
त्यानंतर घरातील सदस्यांनी पाहणी केली असता लोखंडी कपाट तसेच किचनमधील धान्याच्या डब्यांची उचकापाचक केल्याचे दिसून आले. किचनमधील तांदळाच्या डब्यात ठेवलेले सोन्याचे दागिने असलेले पाकीट व १० हजार रुपयांची रोख रक्कम गायब असल्याचे आढळून आले. घरातील सर्वांनी शोध घेतला मात्र चोरीस गेलेला मुद्देमाल मिळून आला नाही.
या घटनेत सुमारे २५ ग्रॅम वजनाचे जुने सोन्याचे दागिने (गंठण, बोरमाळ, कानातील झुबे) अंदाजे ६२,५०० रुपये किमतीचे तसेच १०,००० रुपये रोख रक्कम असा एकूण ७२,००० रुपयांचा ऐवज चोरट्यांनी लंपास केला आहे.
याप्रकरणी फिर्यादी अभिजीत निकम यांनी दिलेल्या तक्रारीवरून जामखेड पोलीस ठाण्यात अज्ञात चोरट्यांविरुद्ध चोरीचा गुन्हा दाखल करण्यात आला आहे. तसेच बावी गावात अभिमान मोहन पवार यांच्या घरातही चोरी झाल्याची माहिती समोर येत आहे, त्यामुळे नागरिकांमध्ये भीतीचे वातावरण अधिक वाढले आहे.
या घटनेचा पुढील तपास पोलीस निरीक्षक दशरथ चौधरी यांच्या मार्गदर्शनाखाली पोलीस कॉन्स्टेबल जितेंद्र सरोदे करीत आहेत.
👉 नागरिकांनी सतर्क राहण्याचे आवाहन पोलिसांकडून करण्यात आले आहे.